ಯಕ್ಷ ಭಾಮಾ

ಹೊಟ್ಟೆಬಾ(ಬ)ಕ

ಹೊಟ್ಟೆ ಬಾ(ಬ)ಕ 

ಏಕಚಕ್ರ ಗ್ರಾಮದಲ್ಲಿ

ನೂಕುತಿರಲು ಕಾಲ ಹೊಟ್ಟೆ

ಬಾಕ ಪುತ್ರನೋರ್ವನನ್ನು ಸಾಕಲಾಗದೇ|

ಸೋಕದಂತೆ  ದುಷ್ಟ ದಿಟ್ಟಿ

ಕಕ್ಕುಲತೆಯ ಪುತ್ರರೈವ

ರೇಕಮತ್ಯದಿಂದಲಿರಲು ತಾಯಿ ಕುಂತಿಯು||

ಕ್ಷತ್ರಿಯಾಣಿಯೆಂಬ ಮಾತ

ಚಿತ್ತದಲ್ಲಿರಗೊಡದಿರುತ

ಪುತ್ರರೈವರಭ್ಯುದಯವನಾಶಿಸುತ್ತಲೀ|

ಪುಟ್ಟ ಮನೆಲಿ ವಾಸವಿರಲು

ಪಟ್ಟ ಪಾಡು ದೊಡ್ಡದಾಯ್ತು

ದುಷ್ಟನೋರ್ವ ವಾಸವಿದ್ದ ಸನಿಹದಲ್ಲಿಯೆ||

ಊರನೆಲ್ಲ ಸೂರೆಗೊಂಬ

ಕ್ರೂರನಾತ ನರರ ತಿಂದು

ಪಾರವಿಲ್ಲದಂಥ ನೋವನೀಡೆ ಜನರಿಗೆ|

ಊರ ಹೊಕ್ಕು ಬಾರದಿರಲು

ಹಿರಿಯರೆಲ್ಲ ಸೇರಿ ಬಕಗೆ 

ಭೂರಿಭೋಜ್ಯ ಮಾಂಸ ನೀಡಲೊಪ್ಪಿಕೊಂಡರು||

ದುಃಖದಿಂದ ಪಾಳಿಯಂತೆ

ಮುಕ್ಕಲಿಕ್ಕೆ ಬಂಡಿಯನ್ನ

ಲೆಕ್ಕವಿಲ್ಲದಂತೆ ತುಂಬಿ ಕಳುಹುತಿದ್ದರು|

ದುಃಖ ತಪ್ತ ಮನೆಯ ಒಡತಿ 

ದುಃಖಿಸಿದಳು ತನ್ನ ಮಗನ

ಮುಕ್ಕಲೆಂದು ಕಳುಹುವಂಥ ಪಾಳಿ ಬಂದಿರೆ||

ಎನ್ನ ಮಗನ ಸಾಕಲಾರೆ

ಚೆನ್ನ ನಾಲ್ಕು ಮಕ್ಕಳುಳಿವರ್

ನಿನ್ನ ಮಗನ ಬದಲು ಭೀಮನನ್ನು ಕಳುಹುವೆ|

ಎನ್ನುತಲೇ ಕುಂತಿ ತಾನು

ತಿನ್ನುವನ್ನ ಗಾಡಿಲಿಟ್ಟು

ಚೆನ್ನ ಭೀಮನನ್ನೆ ಕಳುಹಿ ಹಿರಿಮೆ ಮೆರೆದಳು||

ಭೂರಿ ಭಕ್ಷ ಭೋಜ್ಯವನ್ನು

ದಾರಿಯಲ್ಲೆ ಭೀಮಸೇನ

ಚೂರು ಬಿಡದೆ ಮುಗಿಸಿ ಖಾಲಿ ಗಾಡಿಯಲ್ಲಿರೆ|

ದೂರದಲ್ಲೆ ಕಂಡು ಬಕನು 

ಭೋರನೊಂದು ಗುದ್ದು ನೀಡೇ

ಢರ್ರೆಂದು ತೇಗಿ ಬಕನನಣಕವಾಡಿದ||

ಘೋರಯುದ್ಧದಲ್ಲಿ ಬಕನ 

ಹೋರಿ ಕೊಂದು ಶಕ್ತಿ ಯ ಕಿ

ಮ್ಮೀರ ದೂರದಿಂದಲರಿವ ಹಾಗೆ ಮೆರೆದನು|

ಕ್ರೂರ ದನುಜ ಗಡಣವೆಲ್ಲ

ನೂರು ಗಜದ ಬಲದ ಭೀಮ

ದೂರವಿದ್ದು ತಮ್ಮುಳಿವನು ಹರಸುತಿದ್ದರು||

ಸುಬ್ರಹ್ಮಣ್ಯ ಬರ್ವೆ ಎಂ.

ಭೋಗ ಷಟ್ಪದಿ.

ಅಮರ ಧಾರೆ

ಅಮರ ಧಾರೆ.

ಭೋಗ ಷಟ್ಪದೀ.

ಗಂಗೆಯೆನ್ನುಮರಧಾರೆ

ಸಿಂಗರಿಸುತ ಶಿವನ ಜಟೆಯ

ತುಂಗ ಶಿಖರ ಮಾಲೆ ಸೆಲೆಯ ಸಾಗಿ ಬಂದಳು|

ಹೊಂಗಿರಣನ ವಂಶಿಗಳಿಗೆ 

ಮಂಗಳಕರವಾಗಲೆಂದೆ

ಶೃಂಗಸಮ ತಪಸ್ಸಿಗೆ ಮನ ಸೋತು ಬಂದಳು||

ಮೇಲು ಲೋಕ ಚೈತ್ರಧಾರೆ

ಸೀಳುವಂಥ ರಭಸ ತೋರೆ

ಫಾಲನೇತ್ರ ತನ್ನ ಜಟೆಯಲಾಧರಿಸಿರಲು|

ತಾಳಿ ಸೌಮ್ಯ ನಡೆಯ ಹಿಮದ

ಮೇಲಿನಿಂದ ಶ್ವೇತ ಧಾರೆ

ಶೂಲಿ ಪದವ ಚುಂಬಿಸುತ್ತ ಮೆಲ್ಲನಿಳಿದಳು.||

ಸಗರ ಸುತ ಸಹಸ್ರಕೆಲ್ಲ

ಸೊಗದಿ ಮುಕ್ತಿ ನೀಡಲೆಂದೆ

ಸಗರ ಪೌತ್ರ ಯತ್ನ ಫಲದಿ ಭುವಿಗೆ ಒಲಿದಳು|

ಅಗಣಿತ ಸಮೃದ್ಧಿಯನ್ನು

ಮೊಗೆದು ಕೊಡುತ ಸಾಗಿ ಬರಲು

ಮೊಗೆದು ಕುಡಿದ ಜಹ್ನು ತನ್ನ ಮನೆಯೆ ಹರಿಯಲು||

ಮನವನೊಲಿಸೆ ಸಗರ ಪೌತ್ರ

ಗುಣಿಯು ಜಹ್ನು ಕರುಣಿಸಿದನು

ಜನರಿಗೆಲ್ಲ ಮುದವ ಕೊಡಲು ತನ್ನ ಕಿವಿಯಲು.|

ಇನಿದನಿಯಲಿ ಹರಿಯುತಿರುವ

ಕಣಜಗಳನು ತುಂಬುತಿರುವ

ಮನುಜ ಪಾಪ ಭಂಗ ವಂಗ ನಾಡವರೆವಿಗೂ.||

ಸರ್ವ ಋತುಗಳಲ್ಲಿ ತುಂಬಿ

ಪರ್ವಗಳಲಿ ಪೂಜೆಗೊಂಡು

ನಿರ್ವಹಿಸುತ ಕೃಷಿಗೆ ನೀರ ಪೂರಣೆಯನ್ನು|

ಶರ್ವ ಪ್ರೀತೆ ಹರಿಯ ಸುತೆಯ

ಳೀರ್ವರ ದೇಗುಲಕೆ ತಂತು 

ಸರ್ವರಿಂದ ನುತಿಸಿ ಕೊಂಬ ಭೀಷ್ಮ ಮಾತೆಯು.||

ಸುಬ್ರಹ್ಮಣ್ಯ ಬರ್ವೆ ಎಂ.